تبلیغات
مازندرانی(نکایی) ریکا

مازندرانی(نکایی) ریکا
مازندران قطعه ای از بهشت روی زمین 
صفحات جانبی

ای بینجه کر ای عشق کار
ای هسی تو کاره سوار
دائم تو باشی برقرار
داری همیشه تنه خار
ای هسی تو سعی و تلاش
ته زحمت آخر هسه تاش
بهار بمو شه کاره سر
ورز موقع زمینه سر
گوشه ره گیرنی تیمه جار
ونه دله ره کندی خار
با چند تا مرزه دوره ور
اسا شه کاره گیرنی سر
اینجه اونجه ره لینگه لو
با لله جا گیرنی پیسو
تیم جاره کندی  مشته او
دشت کناره  کندی سو
ته تیمه بینج اوی دله
خیر و خشی خنه دله
قاطی نمک با ظرف او
با خشحالی گیرنی چکو
روزی دبار  با  گرم  او
یواش یواش تیم بونه سو
اسا شونی زمینه لو
با میس پاشنی روبرو
چنگ چنگ دهیل تیم جاره سر
موارکوا ته دوره ور
مرزه  بالا  شه  اینوری
شیرنی دنی تیم جار سری
با لله جا کندی پچیم
نایلونه  وا کندی شه دیم
گرم دکفه ته تیم جار
نوج بزنه بینج خار و خار
اسا ته تیم بونه نشا
زمین نشا بونه شه جا
دسه جمی فصل نشا
ریکا کیجا مرد و زنا
وجین بزو دسه جمی
گرمی هوا  و  او کمی
با لینگلو گیرنی تراک
سامونه مرزه زندی چاک
نا راحتی نا دارنی خو
دشته کنار  تا نصفه شو
بینجه دله کندی هدار
قل دارنه جا ره گیرنی وار
ته نشا اسا بونه گد
وجین و اوره کنده رد
چیلکا مرزا  ره تاشنی
اسبه کوده هی پاشنی
بینج اسا بیه بی چکو
گنی برو ته دره کو
تاشنی اینجه اونجه ره
ناز دنی مشته غوشه ره
ای خاخر و جان داداش
بن تر بزن خار خار بتاش
ته دتا چش دره هوا
ونگ دنی شه جان خدا
نکنه بباره وارش
مه کار و بار بوه ناخش
گرم که باشه ته کسو چنگ
کومپا زنی ره کنده ونگ
کر بزه بیه  کیسه  بار
چند تا هکرده ای برار
کیله زندی نوم علی
زمین دله تو خلخلی
گنی خدا برکت هدا
مه روزی ره حرکت هدا
اگه خدا بوه رضا
پابوس بورم امام رضا
تازه وه کاره راحته
کشاورزی  د  ساعته
الان بمو کومپای گد
گد گده کره کنده رد
صبح تا غروب جینگا سری
بورده دیگه وه اونوری
هر چی بوم از قدیما
کم  بتمه  از  وشونا
یاد وشون نهونه گوم
مه شعر جا نهونه توم




طبقه بندی: مجموعه شعر محلی مازندرانی،
[ 1391/04/14 ] [ 17:35 ] [ مهدی درخشانی منصورکوهی ]
.: Weblog Themes By Iran Skin :.

درباره وبلاگ

مهدی درخشانی منصورکوهی - ساکن شهرستان نکا - استان مازندران
آرشیو مطالب
آمار سایت
بازدیدهای امروز : نفر
بازدیدهای دیروز : نفر
كل بازدیدها : نفر
بازدید این ماه : نفر
بازدید ماه قبل : نفر
تعداد نویسندگان : عدد
كل مطالب : عدد
آخرین بروز رسانی :

امارگیر حرفه ای سایت