تبلیغات
مازندرانی(نکایی) ریکا

مازندرانی(نکایی) ریکا
مازندران قطعه ای از بهشت روی زمین 
صفحات جانبی

قدیما امه گدر نماشتسر بی بو پیدا

اون زمونا که مله مه وسه بی بو دلبخا

کته کا روش بکشی سمت خنه سو بزوبون

وره و گسفن و منگو درکا ر او بزوبون

ککی و کوتر ته شه کلی ور پر بزوبون

مرس و افرای گلام ماتی تی ر سر بزوبون

نماشون با دوش بار نناامو روآر جا

ای دیه کلاج بمو بورده امه چیندکا

خسته تن چرده گیته صرای جا امو ببا

ونه چکه په کته و مار گیته ای گوکزا

چفت سر که پر بیه مختاباد اویا اویا

نماشون منگل په گسفنه سفته ورکا

                  

سرپیش کرک و سیکا اتا اتا شینه شه جا

لته پر جم بهی بون دسه دسه زیک و تیکا

امه شو امه نفار فنر و لمپا سو بیه

ویشه ر خو که گیته مونگه شوی ماه سو بیه

کله پیش امه صفا نجماوطالبا بیه

امه ونگ امه صدا مله زابرا بیه

نماشون مشت صرا چپون لله وا بیه

تموم ملک و ملا تله گوکزا بیه

انبس شو اما ر کله پیش وشنا بیه

سفره که لا بهی بو ای دی تیسا پلا بیه

انبس شو که میا ویشه ر پیته تا صوی

وشنا اشکم که خو نیته هی بیمی پلی پلی

اون زمونا که امو کت کته په سگ لوئه

مله ای دواره زوزه کشیه نصفه شوره

اتا ور ویشه خرنازه امو اسپه کوه ر

اتا ور شال زوزه گیته چش گرم خوره

صوی سر افتاب سو شه پشت لا ر گیتمی

دتایی هیا هیا سمت صرا هیمه شیمی

قدیما امه گدر بند بند سر که نیشت بیمی

یا که کیجاکون همه چشمه شیمی او گیشتمی

قدیما بیستا بیستا مردم باغ سر شیمیی

انجیلی چور دیمی نب بدا بنه خردمی

«آخ خدا اون زمونا چه روزگاری داشتمی

همه گنه قدیما چه روزگاری داشتمی»

اسا که کوه تا مازرون دپیته امه صدا

کچیک و خورده مله اسا بهینه شه آقا

همه شهری بهینه مله ربشتنه تینار

مله خور گنی لوشه ر کج کنه کتار

نکنه مله بوره اما قدیم ر بکوشیم

شه خد ر دس بهیریم اون زمونا ر بروشیم

باین و دواره بوریممله ر سر بزنیم

دتایی ای دواره خنه به خنه در بزنیم

گوکزار ر مار هادیم و لمپا ر سو هاکنیم

بایین و عالم دل ر برارون او هاکنیم



طبقه بندی: مجموعه شعر محلی مازندرانی،
[ 1391/04/14 ] [ 16:18 ] [ مهدی درخشانی منصورکوهی ]
.: Weblog Themes By Iran Skin :.

درباره وبلاگ

مهدی درخشانی منصورکوهی - ساکن شهرستان نکا - استان مازندران
آرشیو مطالب
آمار سایت
بازدیدهای امروز : نفر
بازدیدهای دیروز : نفر
كل بازدیدها : نفر
بازدید این ماه : نفر
بازدید ماه قبل : نفر
تعداد نویسندگان : عدد
كل مطالب : عدد
آخرین بروز رسانی :

امارگیر حرفه ای سایت